Se hai un lugar onde a pandemia parece estar descontrolada, ese é Sanxenxo. O municipio superou con fartura os 2.000 casos por cada 100.000 habitantes e é, desde hai semanas, unha das maiores preocupacións das autoridades sanitarias.
Os casos activos subiron ata os 388, dezaseis máis que onte, o que disparou a 2.228 a incidencia a 14 días. É dez veces máis do que se considera como risco extremo.
Pontevedra, pola súa banda, roza os mil casos por cada 100.000 habitantes. Ten a 822 dos seus habitantes (14 máis que onte) contaxiados, o que se traduce nunha incidencia de 987.
Xunto a estes dous municipios, os peores datos rexístranse en Cambados, que ten unha incidencia a 14 días de 1.392, debido aos seus 191 casos. Iso si, neste caso rexístrase un lixeiro descenso, xa que o número de infectados reduciuse en tres con respecto ao sábado.
En Meaño, cunha incidencia de 1.334, hai 71 casos activos, catro máis que onte.
Dentro dos municipios en nivel de restricións alto ou máximo, tamén baixan os casos en Vilagarcía (266,-4), mentres que seguen subindo en Marín (203, +12), Vilanova (92, +3) e A Illa de Arousa (41, +1). Poio, pola súa banda, mantense igual (180 casos).
Dentro da área sanitaria, crecen os casos activos en Bueu (73, +1), Ribadumia (41, +2), Meis (36, +3), Ponte Caldelas (30, +3), A Lama (15, +4) ou Moraña (15, +1).
Non hai cambios en Cuntis, que segue con 12 casos activos; nin en Portas, que ten 9.
Pola súa banda, a incidencia reduciuse lixeiramente en Cerdedo-Cotobade, que ten nestes momentos 8 casos activos no municipio.