Quince retinógrafos, doce ecógrafos portátiles con intelixencia artificial integrada, noventa sistemas de monitorización ambulatoria da presión arterial e cincuenta dispositivos multidiagnóstico de monitorización automatizada de constantes vitais.
É o novo equipamento electromédico que o Servizo Galego de Saúde irá incorporando paulatinamente nos centros de Atención Primaria de Pontevedra de O Salnés.
Forman parte dos contratos que, valorados en 1,80 millóns de euros, aprobou a Xunta.
Este acordo tamén inclúe mobiliario clínico, consistente en 165 padiolas de exploración, trinta de fisioterapia, así coma outras quince de exploración xinecolóxica e 35 padiolas de transporte.
A intención do goberno galego é dotar a todos os centros de saúde da área sanitaria de novos dispositivos multidiagnóstico, que van permitir, a través dunha táblet con distintos complementos, realizar co mesmo aparello distintas probas diagnósticas.
Entre elas, poderán facerse electrocardiogramas e medicións da presión arterial para previr ou controlar problemas cardiovasculares, o control do índice nocello-brazo para previr trombos ou espirometrías para diagnóstico e seguimento de patoloxías respiratorias.
Así mesmo, os centros que aínda non contan con eles terán dispositivos de monitorización ambulatoria da presión arterial, que o paciente pode levar para casa durante un ou dous días completos da súa vida cotiá e que permiten diagnosticar a existencia ou a evolución de hipertensión.