Alfonso Rueda foi proclamado, por segunda vez, presidente da Xunta de Galicia. Tomará posesión o sábado, 13 de abril, en San Domingos de Bonaval, onde tamén Gerardo Fernández Albor converteuse en 1982 no primeiro presidente da Democracia en Galicia, pero antes, este xoves, designárono xa os votos do Parlamento.
O líder do PP foi proclamado polo presidente da Cámara, Miguel Ángel Santalices, ás 18.11 horas deste xoves por maioría absoluta dos 40 deputados do seu partido e a abstención do único parlamentario de Democracia Ourensá. O resto da oposición votou en contra, 34 votos, 25 do BNG e nove do PSOE.
Un aplauso de máis dun minuto do seu grupo, todos en pé, selou a proclamación, que chega tras dous días de debate da sesión de investidura e con anuncio de última hora, a creación dunha oficina económica que depende directamente del como presidente para coordinar todos os proxectos estratéxicos, "para que non se perda unha soa oportunidade, para facer que Galicia siga avanzando", ademais de para axilizar os fondos Next Generation.
É a segunda proclamación de Rueda, pero será a súa primeira lexislatura completa e, nela, avanzou a súa intención de que "non veña a crispación a Galicia". Precisamente, de "crispación" falou a oposición este xoves, durante as súas intervencións no debate.
A líder do BNG e xefa da oposición, Ana Pontón, mostrou o seu compromiso cunha "política de luces longas", lonxe da crispación que o PP está a instalar na vida pública, "enlamando o debate coa confrontación permanente, onde a lexítima discrepancia é substituída polo insulto ao adversario e polo todo vale". "Para formar parte da Confraría da Perpetua Crispación que lle impón Feijóo desde Madrid, non conte connosco", advertiu a nacionalista a Rueda.
O líder do PSOE, José Ramón Gómez Besteiro, reclamoulle que "poña os intereses de Galicia por encima da política de confrontación de Feijóo e o PP de Madrid". Esixiulle que empregue a investidura "non para ser delegado de ninguén, senón para exercer como presidente da Xunta, logo da decepción da primeira intervención, o pasado martes, centrada en empregar o debate para atacar ao goberno do Estado".
Rueda, pola súa banda, avanzou que "nunca deixaremos de reclamar o que nos corresponde" e tamén que seguirá falando de Galicia en clave estatal. "Para falar de Galicia en serio, hai que falar do que está a pasar en España".
A BNG, PSOE e DO pediulle Rueda "toca remar todos xuntos". Xusto antes, durante a mañá, Pontón presentara ao BNG como unha alternativa de goberno ante a falta dun "proxecto de futuro para Galicia" dun presidente "preso da estratexia de Xénova" que lle impoñen desde Madrid.
Pontón avanzou unha lexislatura de "rigoroso labor de control" sobre a acción de goberno" e ofreceu a Rueda catro grandes acordos de país, en materia de sanidade, acceso á vivenda, modelo enerxético e rexeneración democrática. Pediu ao xa novo presidente que "non desprece a nosa man tendida; por unha vez, escoite, dialogue negocie e teza acordos".
O portavoz do PSOE elevou a cinco os grandes acordos de país para poñer en marcha un Plan de Vivenda, blindar a sanidade pública, a creación dun "ecosistema económico", a defensa do galego e un Gran Acordo Local Gallego.
Besteiro comprometeu unha oposición "firme, construtiva e responsable", con "vocación de goberno" para despregar un modelo de goberno alternativo "sen buscar culpables externos nin inimigos inventados".
O deputado de Democracia Ourensá, Armando Ojea, centrouse na política local e reclamou a Rueda reverter a "discriminación histórica" que sufriu Ourense desde a Xunta. Deulle a súa abstención como voto de confianza, pois "non me gusta como funcionou a Xunta de Galicia ata este momento, pero confío en que cambie a partir de agora".