A Coordinadora para o Estudo dos Mamíferos Mariños (Cemma) coordinou este martes unha operación de rescate no Grove que logrou salvar a dous golfiños que quedaran varados nas proximidades da ponte da Toxa.
Segundo informaron desde o Cemma, tratábase dunha femia adulta, duns 400 quilos de peso, e dunha cría duns 300.
O dispositivo activouse despois da chamada ás 13.00 horas dun veciño ao CAE 112 Galicia alertando da presenza dos cetáceos que quedaran atrapados ao baixar a marea.
Ademais do Cemma participou o Instituto para o Estudo dos Golfiños Mulares (BDRI), que ten sede no Grove, efectivos de Protección Civil e membros da Confraría de Pescadores.
Unha vez que chegou o equipo de expertos á zona numerosos voluntarios colaboraron para conducir a augas máis profundas aos dous golfiños.