Moita emoción, sorpresa e mesmo algunha bágoa escapóuselle aos asistentes, preto do centenar, durante o Rito do Desencravo, celebrado durante o Venres Santo, na Basílica de Santa María. Este Rito forma parte dun dos oficios habituais destas datas, que por primeira vez en máis de 50 anos, hase dramatizado tras o rezo de Vésperas, oración oficial da Igrexa. Desta forma recupérase unha tradición da parroquia.
Ante o altar da Basílica, o escenario creado para a ocasión acollía a un total de 15 persoas que se puxeron na pel de quen acompañou a Jesús de Nazaret durante a súa morte na cruz, por exemplo, o discípulo amado, Juan, a Virxe María, a Magdalena, ou Nicodemo, entre outros moitos.
Aínda que en total participaron 21 persoas para facer posible esta representación, contando aos técnicos de son, a script, un encargado de vestiario, outro encargado da música, e a colaboración das dúas persoas que todos os anos realizan o Desencravo.
Mundo Villalustre, director da obra e actor profesional, manifestaba a súa alegría polo resultado conseguido por todo o equipo de teatro de Santa María, que estiveron traballando desde mediados de xaneiro. Esta alegría é compartida tamén polos propios actores; a actriz que encarna á Magdalena, Carla Coroado, declara que supuxo "unha experiencia de meterse moito no papel, porque non é calquera obra de teatro", pois estaba en verso e contaba con pouco diálogo.
Os actos de Semana Santa continúan este sábado 26 coa Vixilia Pascual, nas diferentes parroquias da cidade do Lérez. No caso de Santa María, estará presidida por Jesús Fernández, Bispo Auxiliar da Diocese de Santiago de Compostela.