O Concello de Ribadumia decide afrontar un modelo de xestión sostible mediante a implantación dun sistema de reciclaxe de materiais procedentes de obras e demolicións.
Esta iniciativa, que se enmarca na aposta municipal pola economía circular, permite transformar elementos como a pedra, o formigón e o asfalto en novos recursos para futuras actuacións.
O proceso consiste na trituración dos materiais para obter áridos reciclados de calidade que logo son empregados en diferentes aplicacións municipais.
Estas novas materias primas teñen múltiples usos, desde o recheo de terreos ata a estabilización de firmes ou incluso novas pavimentacións.
A iniciativa supón unha dobre vantaxe para o municipio, segundo o goberno local. Por unha banda, permite reducir significativamente o volume de residuos xerados polas obras, minimizando o impacto ambiental das intervencións.
Por outra, representa un importante aforro económico ao dispoñer de materiais a un custo moito menor que os de nova extracción, segundo o Concello
A reutilización e o aproveitamento de materiais son fundamentais, destacan desde o goberno local, incidindo na xestión responsable que favorece tanto a protección do entorno como a optimización dos recursos públicos.