Este venres 7, ás 18.30 horas, o Centro Cultural Antonio Fraguas en Carballedo converterase no escenario dun acto especial con motivo do 8-M, Día Internacional da Muller.
O Concello de Cerdedo-Cotobade homenaxeará a catro mulleres emprendedoras xa xubiladas: Inés Cuiñas Vidal, Carmen Vidal Paredes, Alba Sanmartín Serrapio e Digna Filgueira Rodríguez.
Durante o evento tamén se procederá á lectura dun manifesto reivindicativo con motivo desta data que promove a igualdade entre mulleres e homes.
A iniciativa, promovida pola Alcaldía e avalada de forma unánime polos tres grupos políticos municipais, busca poñer en valor a traxectoria destas mulleres, quen compatibilizaron durante décadas o seu traballo empresarial coa vida familiar. Segundo afirmou o alcalde Jorge Cubela, representan "verdadeiros exemplos de superación, resiliencia e constancia".
Cada unha das homenaxeadas deixou a súa pegada no tecido económico e social de Cerdedo-Cotobade. Inés Cuiñas Vidal foi propietaria do restaurante Casa Inés en Carballedo, mentres Carmen Vidal Paredes, de Quireza, destacou como taxista durante moitos anos.
Alba Sanmartín Serrapio rexentou unha panadería en San Xurxo, e Digna Filgueira Rodríguez foi propietaria dun bar en Xesteira (Almofrei). O seu labor pioneiro e compromiso co municipio convertéronas nun exemplo para as xeracións futuras.
O rexedor destacou que, como é tradición, o Concello busca visibilizar o papel das mulleres da localidade que coa súa dedicación e esforzo contribuíron ao desenvolvemento da comunidade.
Cubela subliña que o acto ten tamén unha dimensión reivindicativa ao reclamar a igualdade entre homes e mulleres no ámbito laboral, especialmente no eido empresarial.