O Colexio de Arquitectos de Galicia entregou os Premios COAG de Arquitectura nunha gala celebrada en Santiago e onde dúas rehabilitacións impulsadas en Pontevedra, a da casa consistorial e a da estación de autobuses, foron recoñecidas polo seu resultado.
A reforma da estación de autobuses, deseñada por Manuel Vázquez Muíño, recibiu un accésit na categoría de outros edificios, onde o máximo galardón foi para a rehabilitación do antigo edificio de "Espellos" en San Caetano (Santiago de Compostela).
No caso de Pontevedra, o xurado destacou a "profunda transformación" dun equipamento mediante a reelaboración da súa envolvente para convertelo en referencia dun entorno urbano a ser resignificado.
Subliñaron que a intervención "rescatou o mellor que o edificio orixinal podía ofrecer", a súa estrutura vista e a súa ampla espacialidade, en aras dunha forte limitación orzamentaria.
Gracia Amandi e Jorge de Uña recibiron outro accésit, na categoría de obras de rehabilitación patrimonial e restauración -onde gañou a restauración do pavillón historicista e o muro perimetral de San Martín Pinario (Santiago), polo seu traballo na casa consistorial de Pontevedra.
Foi recoñecido, segundo o xurado, pola dificultade da transformación ás demandas contemporáneas dun edificio dun dos grandes arquitectos da Pontevedra do século XIX, Alejandro Sesmero, sen afectar aos seus principais valores tectónicos e espaciais.
Ademais, celebraron que a reforma engadira unha linguaxe de escala menor que resolve os usos e formas actuais "sen estridencias coa preexistencia".
A única actuación na área de Pontevedra que recibiu un dos principais galardóns destes Premios COAG de Arquitectura foi o Laboratorio da Paisaxe, que impulsa Sheila García en Barro, que gañou na categoría de divulgación e investigación.
O xurado elixiuno pola abordaxe investigadora para o coñecemento e revalorización do territorio a través dunha "profunda coherencia e preocupación urbanística e arquitectónica", abundando así na protección patrimonial do físico e o inmaterial.
A gala, presentada pola xornalista Carmen Novás, contou coa actuación do actor Quico Cadaval, que fixo varios monólogos referidos ao colectivo profesional, como a función da arquitectura, o urbanismo e o territorio, e a vivenda.
Música de jazz en directo animou o relevante evento, certame colexial que se celebra cada dous anos e no que o decano dos arquitectos galegos, Luciano Alfaya, destacou que " unha boa arquitectura é sempre sinónimo dunha maior calidade de vida para quen a desfruta e para toda a cidade".