A arte rupestre galega forma, sen dúbida, un dos conxuntos de petróglifos prehistóricos ao aire libre máis importantes de Europa. Pero parte destes gravados corren un grave risco, non só de deterioración senón de desaparición, segundo os expertos, ante a ausencia de coidados en materia de limpeza e mantemento que aseguren a súa conservación.
Por iso, unha petición popular dirixida á Xunta e impulsada desde Pontevedra, insta o goberno galego a iniciar os trámites para conseguir a súa declaración como Patrimonio da Humanidade, a medida "máis eficaz" para garantir unha supervivencia que está "seriamente ameazada", segundo se recolle no manifesto SOS Arte Rupestre.
Os impulsores desta iniciativa son o arqueólogo Antonio de la Peña, o historiador Bienaventura Aparicio e o antropólogo Rafael Quintía que buscan crear un movemento cidadán de "reivindicación e denuncia" ante a situación de "abandono" que sofren estas áreas rupestres por parte de Patrimonio.
Os tres coinciden que os petróglifos galegos "pódense equiparar" ás covas da cornixa cantábrica ou ás pinturas da zona levantina, en canto á súa riqueza patrimonial, a súa beleza estética e a súa relevancia histórica, pero atópanse actualmente "desprotexidos" e sen ningún tipo de "salvagarda" ante as inclemencias do tempo ou a man do home.
Así, denuncian que a proliferación de matogueira e arboledo na súa contorna deixan aos petróglifos "sen ningunha protección" cando se producen incendios forestais, ao crebarse a pedra polas altas temperaturas. Ademais, citan as obras "incontroladas" ou os traballos no monte que se realizan sen adoptar "medidas preventivas" como outros dos riscos.
Estes tres expertos denuncian que unha parte "considerable" deste patrimonio rupestre atópase en perigo e puxeron o exemplo da emblemática Pedra das Ferraduras de Campo Lameiro, á que cualifican como un dos dez monumentos máis importantes de Galicia, e que a pesar do seu valor "incalculable" atópase "totalmente abandonado".
Ademais, lembran que a Xunta de Galicia "nin sequera" elaborou un catálogo oficial que recolla a existencia de todos os petróglifos que se conservan en Galicia, un "desleixo" que afecta a unha das manifestación artísticas "máis valiosa" da humanidade.
Entenden que a declaración de Patrimonio da Humanidade -que xa teñen as pinturas e gravados cantábricos e levantinos- serviría "para que veña xente de todo o mundo a visitalos" e as administracións aposten pola súa conservación, polo seu estudo e pola súa divulgación, tarefas que actualmente realizan tanto colectivos e asociacións como afeccionados a título particular e de forma desinteresada.