Ravachol chega este ano conxelado, regresa á súa cidade con frío. Con bata de casa e un contador da luz.
O plumífero trae o corpo "arrepiando", nin sequera se quenta co cabreo, pois din os seus creadores que está "moi enfadado co Goberno do Estado, co ministro de Industria e coas empresas do sector eléctrico que impoñen todos os anos unhas taxas abusivas e inxustas".
De novo chega Ravachol encabuxado co goberno, "aínda que nunca co municipal", como lle reprocharon algúns cidadáns que esperaban do loro algunha crítica "aos de casa".
Nesta ocasión, dirixe as súas reproches ao "tarifazo" que "impide que tanto el como moitos dos seus conveciños, poidan quentar minimamente os seus fogares, mentres estas empresas e os seus consellos de administración, cheos de políticos, fártanse de gañar diñeiro sen importarlles o máis mínimo o resto da sociedade".
María Simal, portavoz da Irmandade do Ravachol, leu o discurso no que animou á cidadanía neste Entroido a "levantar a voz, temos que facernos oír para que deixen de asoballarnos políticos e empresarios sen escrúpulos".
ENTERRO
Con tanto frío seguro que Ravachol vai quedar "pajarito". De feito, para este sábado esta previsto ás 18.00 horas que comece o velorio e ás 21.00 horas sairá o cortexo fúnebre desde a praza da Verdura acompañado do seu séquito e das comparsas percorrendo as rúas San Roman, Ferrería, Paseo de Antonio Odriozola, Soportais, Manuel Quiroga, Princesa, Isabel II, rúa Real, Sarmiento, Pasantería e Praza da Ferrería.