O Grupo Municipal Socialista levará ao vindeiro Pleno do Concello de Pontevedra unha moción para reforzar o papel da cidade no mapa ferroviario galego e europeo.
A iniciativa, que vén da man do portavoz Iván Puentes, céntrase en dous eixos fundamentais: a integración na futura rede de Cercanías de Galicia e o impulso definitivo á conexión de alta velocidade con Portugal.
A proposta socialista persegue crear un servizo de Cercanías que conecte de xeito eficiente a área metropolitana formada por Pontevedra, Vigo e Vilagarcía de Arousa.
Un dos aspectos máis innovadores é a aposta por un billete único que integre todos os medios de transporte público: tren, autobuses interurbanos e liñas urbanas.
A moción contempla tamén estender a liña de Cercanías ata Valença do Minho, unha medida que busca fortalecer a integración da Eurorrexión Galicia-Norte de Portugal.
"O ferrocarril é e será unha das infraestruturas clave no desenvolvemento social e económico de Galicia e Pontevedra", afirma Puentes, quen destaca a importancia estratéxica da cidade na conurbación das Rías Baixas e no Eixo Atlántico.
A proposta tamén insta aos gobernos de España e Portugal a axilizar a conexión de alta velocidade entre Porto e Vigo, establecendo como horizonte o ano 2030, en liña cos acordos acadados nos cumios da Guarda (2020) e Viana do Castelo (2022).
Segundo os socialistas, a integración de Galicia na rede de Cercanías, prevista para este 2025, suporá importantes vantaxes para os usuarios: billetes máis económicos grazas ao cofinanciamento entre os gobernos español e galego, e un incremento significativo das frecuencias.
Lembran que a estación de Pontevedra xa rexistra máis de millón e medio de viaxeiros anuais, situándose entre as 15 con maior tráfico de toda España.