Entre 40 e 50 persoas secundaron no serán deste martes unha concentración convocada polo Colectivo Transfeminista Fulanas diante da Comisaría Provincial da Policía Nacional de Pontevedra.
O colectivo convocou a protesta ao tempo que aseguraba que durante os últimos días se produciran na cidade dous delitos de natureza sexual contra mulleres. Este martes, xa diante da Comisaría, a asociación detallou a súa denuncia, que se refire a dous feitos diferenciados, unha agresión sexual e o comportamento dun exhibicionista que persegue e intimida mulleres pola rúa.
Por unha banda, falan dunha suposta agresión sexual na zona da Parda. Por estes feitos hai denuncia na Comisaría Provincial desde hai varios días.
Segundo a información policial oficial facilitada, nun primeiro momento, a vítima falou dun delito de roubo e de lesións e logo regresou á Comisaría, acompañada por un avogado e por esta asociación, e ampliou a denuncia detallando unha agresión sexual.
Desde o colectivo Fulanas insisten en que houbo unha agresión sexual, como detalla a ampliación da denuncia, e que hai "evidencias máis que de sobra". Andrea Estévez, deste colectivo, explicou aos medios antes da concentración que hai esas probas "polo comportamento deste suxeito" e insiste en que houbo "violencia física" por "tirar a rapaza ao chan, arrastrala, taparlle a boca, amordazala...".
En canto ao episodio cun exhibicionista, nun primeiro momento, este colectivo falaba duns feitos sucedidos na avenida de Santa María, pero nos últimos días ata 12 mulleres puxéronse en contacto con elas asegurando que foran vítimas do seu acoso.
Desde Fulanas falan de 12 vítimas que "xa están intentando poñerse de acordo para ver como xestionar este caso" e sinalan que tres desas mulleres acudiron na tarde deste martes á Comisaría para denunciar os feitos.
Estas mulleres acudiron á Policía Nacional para denunciar un mesmo suposto agresor. "É unha persoa que persegue as mulleres, as intimida mentres se masturba", explican.
Segundo indican, só chegou a ter contacto físico con unha desta mulleres, unha rapaza que relata que foi atacada o día 3 de xaneiro na avenida de Santa María e este martes formalizou a denuncia. Segundo sinalan desde Fulanas, "perseguiuna ata a porta da casa con uso de forza para entrar no portal".
No resto dos casos hai "un acto de exhibición, pero con intimidación, persecución, etc".
As persoas que este martes se concentraron diante da Comisaría sinalan que pensan que son dúas persoas distintas "porque teñen modus operandi moi diferentes", pero agardan que sexa a Policía a que o concrete.
Precisamente, con esta concentración querían criticar o traballo policial á hora de atender estas mulleres que acoden á Comisaría, pois aseguran que algunha das mozas que foi denunciar este martes tivo que regresar por segunda vez porque a primeira non as atenderon do xeito que consideran axeitado.
Así, desde Fulanas sinalan que a primeira vez que foron a algunha dixéronlle "que se non as tocaran non era tan grave ou que non era denunciable porque as persoas se podían masturbar na vía pública". Segundo este colectivo, unha destas mulleres foi á Comisaría e dixéronlle que volvera outra día "porque non estaba a unidade especializada no momento no que elas viñeron".
Andrea Estévez insiste en pedir máis medios policiais para atender as vítimas. Sinala que "é unha situación violenta e difícil xa para as vítimas achegarse á policía para facer estas declaracións e xa que son valentes para facelo, que teñan todos os recursos e ferramentas para levar adiante estas denuncias".
Durante a concentración, levaron carteis con mensaxes contra o traballo policial. "Agresores nas rúas, e a UFAM...?", "Fun denunciar e mandáronme para a casa", "Nas rúas agrídenme, a policía cuestióname", "Nesta Comisaría cuestiónase as vítimas" foron algunhas das frases que mostraron.
Ademais, berraron, cun altofalante, "UFAM, menos cuestionar e máis traballar", "o voso trato tamén é violencia" ou "rúas seguras". Ademais, pediron "agresores fóra das nosas vilas" ou "soa, borracha, quero chegar á casa".