O PSOE de Poio criticou duramente o goberno municipal liderado polo alcalde Ángel Moldes pola falta de efectivos na Policía Local.
Os socialistas denuncian que non se están a cubrir as quendas necesarias para garantir a seguridade dos cidadáns, especialmente na quenda de tarde.
Segundo o grupo que encabeza Gregorio Agís, o goberno local mostra unha preocupante falta de previsión e compromiso ao non manter os servizos básicos, como a cobertura policial nestas horas.
Desde o PSOE, lembran que Moldes, cando estaba na oposición, facía fincapé na necesidade de instaurar un servizo policial nocturno.
"Agora non só non cumpriu a súa promesa, senón que tampouco é capaz de manter as quendas que existían previamente", sinalan.
A formación critica tamén a falta de información e transparencia, xa que, segundo denuncian, os veciños non foron informados da situación nin de cando se restablecerá o servizo.
Aseguran que "está aumentando a sensación de inseguridade" no municipio.
O PSOE asegura que varios factores coincidiron na falta de cobertura: un axente está de baixa, outro finalizou o seu contrato, e un terceiro marcha en comisión de servizo.
Ante isto, sosteñen que nin o alcalde nin a concelleira responsable lograron resolver os problemas ou negociar alternativas para evitar a interrupción do servizo.
RESPOSTA DO GOBERNO LOCAL
En resposta a estas acusacións, o Concello de Poio, encabezado polo alcalde Ángel Moldes, negou que se eliminara a quenda de tarde de forma definitiva.
Segundo o goberno local, trátase dunha "situación puntual e extraordinaria", causada pola coincidencia da marcha de dous axentes en comisión de servizo e a baixa doutro por motivos de saúde.
O Concello defendeu a lexitimidade das comisións de servizo, e afirmou que traballan xa na procura de solucións co xefe da Policía Local e estudan a incorporación de novos axentes para resolver o problema "coa maior brevidade posible".
"O goberno local non pode saber cando hai unha baixa", afirma Moldes, quen asegura que "en ningún caso vai eliminarse a quenda de tarde".
Tamén aseguraron que, malia esta situación excepcional, a seguridade veciñal está garantida en todo momento, a través de servizos de emerxencia como o 112, outros corpos de seguridade, e Protección Civil.
O goberno municipal lamenta que o PSOE cuestione unha situación que cualifican como "puntual" e que non compromete a seguridade do municipio