En apenas quince días, ao longo da primeira quincena de marzo, comezarán as obras para a creación do novo parque da Parda, unha gran zona verde duns 33.000 metros cadrados que terá á auga con fío condutor de todo o seu espazo.
Así o anunciou o alcalde de Pontevedra, Miguel Anxo Fernández Lores, tras a reunión que mantivo este venres con representantes das dúas empresas que executarán estes traballos, as pontevedresas COVSA e Construcciones Ramírez.
Fernández Lores destacou que lle fai "especial ilusión" que sexan estas dúas compañías as que se encarguen da que é unha das obras "máis importantes deste mandato", porque son empresas "serias" e que teñen "experiencia" traballando en Pontevedra.
Tras este encontro de coordinación, no que participaron o edil responsable da área de parques e xardíns, Xaquín Moreda, e técnicos municipais, o rexedor explicou que os traballos neste ámbito comezarán coa roza de todo o terreo.
A partir de aí, durante dous meses, os encargados desta actuación elaborarán un estudo "porque hai moita auga" na parcela, segundo detallou o alcalde, polo que se localizarán todos os "olleiros" para poder canalizar toda esa auga pola superficie do parque.
Isto podería supor "reaxustes" no proxecto, recoñeceu Fernández Lores, que marcaba unha determinada circulación destas augas, de forma que se cambien as canles previstas.
A execución do parque está prevista en 28 meses, pero COVSA e Construcciones Ramírez "nos trasmitiron que a súa idea é tentar acurtar un pouco vos prazos", afirmou o alcalde, que lembrou que esta actuación conta cun orzamento de 5,3 millóns de euros.
Dos 33.000 metros cadrados, uns 10.000 reservaranse para o futuro pavillón da Parda, un proxecto que se vai a acometer por separado e para o que aínda se están definindo todos os detalles. Mentres non se defina, todo este espazo será unha pradaría.
No resto deste futuro parque plantaranse 1.800 árbores e especies arbustivas, repartidas especialmente entre as súas múltiples zonas axardinadas. Haberá ademais dúas zonas de aparcadoiro, unha próxima aos xulgados e a outra cara á Rúa Entrevías.
Ao longo de todo este ámbito, aproveitando as diferentes alturas do terreo, habilitaranse varios miradoiros sobre a estación do tren e a cidade. O proxecto incluirá ademais un parque infantil e paseos habilitados ao longo de todo a canle de auga.
A este futuro parque poderase acceder por dous lugares, a través desde a zona dos xulgados da Parda e tamén polas rúas Entrevías e Ramón Otero Pedrayo.
Desde esta segunda zona, vaise a poder conectar ademais co parque do Gafos, de maneira que quede unha gran área natural e de esparexemento que comunique tamén con Tomeza.
ESTUDO DE VIABILIDADE DO PAVILLÓN
Con respecto ao futuro complexo deportivo da Parda, o alcalde sinalou que nestes momentos o Concello está a realizar unha serie de estudos para analizar a viabilidade dun proxecto sobre o que planean "múltiples variables".
O goberno municipal confía en ter un anteproxecto redactado antes de que termine este mandato e ter "moi avanzada" o financiamento desta infraestrutura deportiva que, segundo algunhas estimacións, estaría por encima dos 15 millóns de euros.
A este respecto, entre as opcións que se barallan este estudo de viabilidade estaría a posible xestión privada destas instalacións, cedendo un espazo para un aproveitamento como ximnasio ou centro deportivo, a cambio de facerse cargo do seu mantemento.