Alfageme volve aos tribunais, aínda que esta vez non pola xestión dos seus anteriores propietarios. O sindicato CIG presentou unha querela por un suposto delito de prevaricación e malversación de fondos públicos no proceso de venda da conserveira. Así o adianta a axencia Europa Press. Os denunciados son os conselleiros de Industria, Francisco José Conde, e de Facenda, Elena Muñoz, así como o exconselleiro Javier Guerra.
O sindicato nacionalista considera que debido á actuación dos responsables políticos denunciados, entre os que inclúen tamén ao director do Igape, Javier Aguilera; e á secretaria xeral do Patrimonio, Socorro Martín, durante o proceso de liquidación e venda de Alfageme perdéronse os 30 millóns de euros que a Xunta pagou en concepto de avales, así como 5,9 millóns de euros na poxa das naves e das marcas da conserveira.
Así o explica a responsable do Área de Alimentación da CIG, Rosa Abuín, quen recordou que "desde hai tres anos vimos denunciando que non existía responsabilidade política para recuperar o proceso produtivo de Alfageme e o tempo deunos a razón". Durante todo este tempo, asegura, "o máis lamentable é que polo camiño quedaron máis de 36 millóns de euros e 160 postos de traballo".
Na súa querela, a CIG argumenta que tanto o director do Igape como os conselleiros de Industria e a titular de Facenda tomaron decisións "a sabendas de que infrinxían preceptos legais ou incumprindo os trámites que establece a lei". Ademais considera que a adquisición por parte do Igape das naves de Vilaxoán e de Ribadumia, así como da marca Miau, realizouse "mediante o pago dun prezo, a título oneroso sen o informe favorable do centro directivo competente en materia de patrimonio".
Expón tamén a CIG nesta querela que os denunciados utilizaron diñeiro público naquilo para o que non estaba destinado "co ánimo de protexer a nefasta xestión realizada". Por todo iso, solicitan para os denunciados unha pena de inhabilitación especial para emprego ou cargo público de entre sete e dez anos.
Coa presentación desta querela, a CIG pretende esixir responsabilidades a quen, ao seu entender, "de forma irresponsable" xestionaron o proceso de venda de Alfageme. "Sabemos que con esta medida non imos recuperar o proceso produtivo da conserveira nin os postos de traballo pero polo menos esiximos que os culpables deste fracaso paguen por elo", explicou Rosa Abuín.
A CIG considera que o proceso de liquidación de Alfageme é xa "irreversible", máxime cando esta mesma semana a administración concursal vendeu a maquinaria da conservera por un millón de euros a un comprador de Murcia. "Que ten agora a Xunta, entón?", pregúntase Rosa Abuín. "Dúas naves baleiras e unha marca que leva anos fóra do mercado. A quen pretende venderlle iso?".
A portavoz do sindicato indicou tamén que os responsables da empresa conserveira cántabra El Consorcio informáronlles que ante a venda da maquinaria e a negativa por parte do Igape de sacar a concurso os bens adquiridos retiran definitivamente a súa opción de compra e a súa intención por relanzar Alfageme.