A presenza do alcol na condución está considerada como un dos factores de risco que máis se atopa implicado nos accidentes de tráfico en España, segundo sostén a Dirección Xeral de Tráfico (DXT).
Os datos oficiais indican que o alcol é responsable de entre o 30% e o 50% dos sinistros mortais no noso país.
O ministro do Interior, Fernando Grande-Marlaska, anunciou este xoves o proxecto para modificar o Regulamento Xeral de Circulación e reducir a taxa de alcoholemia en sangue para todos os condutores ata os 0,2 g/l fronte aos 0,5 gramos por litro, ou de alcol en aire expirado superior a 0,25 miligramos por litro.
Nos meses de xullo e agosto fixéronse máis de 32.767 probas de alcoholemia por parte dos axentes do Subsector de Tráfico de Pontevedra, á marxe das diferentes probas que poidan facer outros corpos policiais.
Segundo informou a xefa provincial de Tráfico, Paula Yubero estas probas foron realizadas "en las vías de especial conflictividad" que son aquelas en as que existe unha importante afluencia de público e nas que se detectou un 3,29% de positivos "un porcentaje notablemente superior que hace cuatro años".
Este dato preocupa aos responsables de Tráfico xa que antes da pandemia de coronavirus a porcentaxe de resultados positivos era dun 1,7%.
Das 32.767 probas de alcoholemia realizadas 28.460 foron por control preventivo, 3.546 realizáronse despois de que o condutor cometese algún tipo de infracción, 739 por accidente e o resto porque os axentes detectaron síntomas de que o condutor puidese estar ebrio.
O 83% das persoas que deron positivo en alcol no mes de xullo eran homes e un 80% en agosto. Este verán reduciuse un pouco a franxa de idade de positivos, a maior porcentaxe de positivos detectouse en persoas entre os 25 e os 34 anos, seguido da de 15-24. O ano pasado a maior porcentaxe foi entre os 45 e 64 anos.
TEST DE DROGAS
En canto aos test de drogas os axentes de Tráfico realizaron 680 probas a condutores das cales 367 foron positivas, o que implicou un 54%.
Convén aclarar que a Garda Civil unicamente somete ao narcotest a aqueles condutores nos que se detecta unha sintomatoloxía nunha exploración previa mentres que co alcol as probas fanse aleatoriamente, por iso sempre a porcentaxe é moito maior nos test de droga.
O 78% das probas de droga, é dicir 530, foron por control preventivo o que indica que o 51% das probas de control preventivo foron positivas. O 91% dos positivos foron homes e a franxa de idade entre 35 e 44 anos supón a maior porcentaxe, seguido de 25 e 34 anos.
Un total de 313 condutores foron denunciados por vía administrativa e non houbo ninguén posta de disposición xudicial neste material.