O alcalde de Pontevedra confirmaba este xoves que xa está aprobado e asinado o contrato para a celebración dos Premios Feroz durante os anos 2025 e 2026 na cidade.
O contrato establece que o Concello de Pontevedra destina 800.000 euros anuais, máis IVE, para desenvolver a programación dos galardóns da crítica cinematográfica.
O documento asínase entre o Concello e a Asociación de Informadores Cinematográficos de España que preside María Guerra, colectivo que conta coa exclusiva para celebrar estes premios.
Segundo manifestou Miguel Anxo Fernández Lores, os estudos que realiza a empresa Onclusive demostran que os resultados de promoción están a ser "espectaculares".
Asegurou que a rolda de prensa realizada no mes de maio na terraza do Pazo da Cultura tivo unha repercusión mediática e publicitaria estimada en máis dun millón de euros.
Lores tamén lembrou que a última gala dos Premios Feroz celebrada en Zaragoza tivo unha repercusión avaliada supera os 57 millóns de euros.
"Non hai cartos", afirmaba Lores, para pagar estas promocións publicitarias da cidade.
A programación relacionada cos Premios Feroz, que inclúe obradoiros, actividades e proxeccións, segundo o goberno local, xa está a ser un éxito.
Lores indicou que o goberno local seguirá traendo eventos "que promocionen e coloquen no mapa do mundo a Pontevedra".
Precisamente, o mércores 16 de outubro está prevista a proxección de 'Samsara', de Lois Patiño, na Facultade de Comunicación e foi necesario establecer a proxección no Auditorio do centro educativo debido á demanda de invitacións.
A gala de entrega dos Premios Feroz está prevista para o 25 de xaneiro de 2025 no Pazo da Cultura.