O informe técnico do Centro de Estudos e Experimentación de Obras Públicas (CEDEX), dependente do goberno central, sobre o dragado do Lérez segue xerando polémica en Pontevedra.
Este organismo conclúe que o punto E8, coñecido comunmente como punto exterior de Sálvora, "deberá ser considerado prioritario sobre outras alternativas" para depositar os lodos resultado do dragado do río Lérez.
Tras coñecelo, a concelleira e senadora do PP Pepa Pardo acusou ao Ministerio para a Transición Ecolóxica e o Reto Demográfico de "tomar o pelo a todos os pontevedreses e galegos", pois este punto é o mesmo emprazamento que o propio Goberno de España prohibira desde 2021.
Pardo considera que se trata dun cambio de postura "inconcibible" e sinala que a prohibición da vertedura en Sálvora en 2021 paralizou máis de 16 proxectos autonómicos, incluído o dragado do Lérez. "Agora, despois dun bloqueo de catro anos, o Ministerio conclúe que o punto de vertedura axeitada é o mesmo que xa utilizaba a Xunta?", pregúntase.
Desde o PP de Pontevedra esixen explicacións ao Executivo central, xa que consideran que esta paralización "causou graves consecuencias" para o sector pesqueiro e marítimo. "Parécenos unha vergoña que un proxecto tan importante para a ría de Pontevedra estea bloqueado tantos anos por unha decisión que parece completamente arbitraria", sinalou a senadora dle PP
Pepa Pardo tamén responde o subdelegado do Goberno en Pontevedra, Abel Losada, polas súas declaracións deste venres, tras coñecerse o informe. Considera que "debe dar explicacións, pedir perdón polos prexuízos ocasionados a Galicia e asumir responsabilidades" por "catro anos de parálises".
"Está no seu cargo para defender a Pontevedra e aos pontevedreses. El dragado do río Lérez era fundamental e foi paralizado sen motivo. Que ten que dicir respecto diso?", pregúntalle Pepa Pardo.
Para a senadora do PP, "esta falta de criterio e este cambio de postura demostra que, en 2021, o Goberno non tiña un criterio claro nin unha xustificación real para paralizar estes proxectos. É urxente que dean unha explicación seria á cidadanía".
Ademais, lembra que abordou esta "parálise" no Senado en repetidas ocasións, a última vez cunha pregunta escrita en novembro de 2024 que o Goberno central respondeu, a finais de decembro, con evasivas sobre o punto de vertedura.