O portavoz do grupo municipal do Partido Popular de Pontevedra, Rafa Domínguez, convocou as asociacións empresariais da cidade a unha reunión para informarlles dos pasos que vai dar o PP local para tentar que o Concello non solicite os datos económicos das empresas da Boa Vila "para aplicarlles o 'tasazo' de Pedro Sánchez" no recibo do lixo, en función da súa facturación.
Domínguez e a concelleira Pepa Pardo, expuxeron a súa postura a Vicente Domínguez (AEMPE); José Ramón Caldas e Lucía Pedroso (APE); Arturo Ramírez, José Manuel Valenzuela e Iago Martínez (Foro Empresa Pontevedra); e Eduardo Barros (Cámara de Comercio de Pontevedra).
Os populares sinalaron as consecuencias que consideran que terá a aplicación da nova ordenanza fiscal nos termos que está exposta no documento municipal sobre os principios básicos.
O PP local rexistrou unha moción para frear a implantación obrigatoria da taxa de residuos e manifestar o seu "profundo rexeitamento" á "obriga de establecer o 'tasazo', tendo que repercutir o custo íntegro da recollida, xestión e tratamento de residuos aos cidadáns a partir do 10 de abril de 2025" porque supón "un novo ataque ao peto dos pontevedreses", ao impedir que as administracións locais apoien aos contribuíntes asumindo parte do importe.
Neste contexto, incidiu en que a nova taxa "supón un agravio económico" para os cidadáns e as empresas, ademais dun menoscabo para o fortalecemento da corresponsabilidade cidadá na consecución do obxectivo común de reducir e dar unha segunda vida aos residuos.
Na proposta de acordo dos populares tamén se recolle que, no caso de que o Goberno central non acceda a derrogar a implantación obrigatoria da taxa de residuos, se chegue a un acordo para que "o Concello non solicite os datos económicos dos negocios e actividades lucrativas" da cidade.
En terceiro lugar, o PP demanda a realización de "un estudo do impacto pormenorizado que permita definir o custo do servizo".