Os concelleiros do PP Pepa Pardo, Silvia Junco e Martín Martínez visitaron este venres a parroquia pontevedresa de Alba para coñecer a súa situación actual.
Despois da visita, Junco denunciou a "absoluta despreocupación" do Goberno local do BNG pola parroquia e un estado de "abandono".
Así, constataron sobre o terreo "numerosas deficiencias" como o feito de que "a roza dos camiños e a limpeza das cunetas e dos colectores é claramente insuficiente".
Dúas das cuestións máis "sanguentas" que detectaron son a existencia de sinais que levan meses tiradas na estrada ou un farol caído no lugar de Pontecabras.
Os 'populares' ven aínda máis preocupante que suceda isto nunha parroquia que é zona de paso de decenas de peregrinos do Camiño de Santiago.
Como resultado desta visita, esixen ao Goberno local a realización de "tarefas de conservación, mantemento e posta en valor" desta zona rural pontevedresa.
Os concelleiros do PP esixen aos do BNG "porse as pilas" para mellorar o estado do rural pontevedrés, que "paga os mesmos impostos que os residentes do centro urbano para ter as súas parroquias en óptimas condicións".