Porta aberta á ampliación da Vía Verde entre Pontevedra e Soutomaior

Vilaboa
02 de abril 2025

Nunha carta remitida ao Concello de Vilaboa o Ministerio de Transporte asegura estar aberto a analizar fórmulas para a cesión temporal das vías

Papá Noel, no treito ferroviario proxectado como Vía Verde
Papá Noel, no treito ferroviario proxectado como Vía Verde / Concello de Vilaboa

El Ministerio de Transporte e Mobilidade Sostible mostrouse receptivo á posibilidade de converter nunha vía verde as vías ferroviarias en desuso en Vilaboa, entre Pontevedra e Soutomaior.

Así o explica o Concello de Vilaboa aludindo á resposta por carta que o ministerio lle remitiu tras unha petición de reunión para abordar esta cuestión.

Segundo explica o goberno local de Vilaboa, na misiva aseguran que tanto desde Adif como desde o ministerio están abertos a analizar fórmulas para a cesión temporal das vías mentres non sexan necesarias para a súa explotación ferroviaria.

Suxírese de feito a posibilidade de subscribir un convenio para que as entidades interesadas en crear unha nova vía verde poidan facerse cargo dos terreos para o seu acondicionamento.

Afirma o alcalde de Vilaboa, César Poza, que esta resposta abre unha posibilidade real para traballar na consecución dunha infraestrutura moi demandada polos veciños e que supón un impulso ambiental e para a sustentabilidade turística da comarca.

Reconverter as vías en desuso suporía dar continuidade á vía verde existente entre Pontevedra e Caldas de Reis.

Unha opción de mobilidade peonil e ciclista que podería mesmo prolongarse no futuro até Portugal, aínda que para iso piden a impliación do resto de administracións.

"Agradecemos a receptividade do Ministerio de Transporte ante esta iniciativa, que consideramos fundamental para o futuro desenvolvemento turístico e medioambiental da nosa comarca", afirma Poza.