Avisos por obras, rúas cortadas, anuncios de actividades culturais e deportivas ou a ocupación dos aparcamentos. Son só algúns dos asuntos que os cidadáns de Pontevedra poderán consultar nos tres paneis LED informativos que se van a instalar na cidade.
Estes tres primeiros paneis, aos que lles seguirán polo menos outros catro, serán instalados en puntos estratéxicos, coincidindo cos accesos á cidade.
Os paneis serán xestionados desde a sede da Policía Local e a súa instalación está incluída dentro do contrato de control semafórico da cidade.
A cimentación destes paneis xa está feita. Estarán na avenida de Compostela (ao carón da rotonda que baixa de Pasarón), en Domingo Fontán (na rotonda que dá acceso á Ponte das Correntes) e en Josefina Arruti (na rotonda que linda e fai cruce coa Rúa da Estación).
"A base de formigón xa está preparada e a instalación será realizada o vindeiro luns, co formigón xa repousado", explicou a edil de Seguridade Cidadá, Eva Vilaverde.
Estes paneis contan cunhas dimensións de 3,4 x 2,76 metros e 25 centímetros de grosor. Cada un deles ocupará unha superficie total de 7,17 metros cadrados e terá unha resolución de 230x224 píxeles por polgada, 215.040 luces LED, e 71.680 píxeles.
Todo isto ofrecerá unha distancia óptima de visión próxima aos 10 metros.
"Traballaremos con calquera tipo de texto que queiramos incluír, programado ou non. Poderanse modificar os paneis desde a central da Policía Local ou por bluetooth", asegurou Vilaverde.
Os paneis serán complementados co proxecto xa presentado con anterioridade polo Concello de Pontevedra, que procura recibir fondos Next Generation e que contempla a colocación de catro paneis máis en outros catro puntos máis da cidade.
Estes catro futuros paneis contarán ademais con medidores de calidade de aire e outros sensores, para recoller datos que demostren os compromisos incluidos no novo PMUS.