Os impostos e taxas municipais seguirán un ano máis sen cambios en Pontevedra.
O Concello anunciou este venres a través do conselleiro de Facenda, Raimundo González, a decisión de conxelar "todas as taxas e impostos municipais por undécimo ano consecutivo".
"Subir é o último recurso", xustificou o edil resaltando que grazas a esta medida "1.560.000 euros quedarán no peto dos cidadáns", ao ser a cifra que correspondería a unha actualización pola subida do IPC.
A decisión, asegura, baséase nun estudo de proxección económica que resalta que "pese a non subir as taxas os ingresos foron incrementando" por diversos motivos.
Entre eles, citou o maior movemento económico que aumentou a recadación de impostos como o de plusvalía ou o ICIO, así como o incremento das transferencias do Estado.
Por todo iso e "aínda que poida parecer obvio", coa recadación actual cúmprese co obxectivo de garantir e poder prestar os servizos básicos fundamentais, polo que cree o concelleiro que non é necesaria unha subida ou actualización.
"O que buscamos é a equidade fiscal, que todo o mundo pague. Non é un afán recadatorio, é tratar a todos os cidadáns da mesma maneira, ademais de buscar eficiencia no gasto", explicou Raimundo González en representación do goberno local.
A previsión é que o próximo ano Pontevedra recade ao redor de 56 millóns de euros a través das 20 taxas e 5 impostos que xestiona directamente,
A elas se sumarán como ingresos case 25 millóns correspondentes a transferencias do Estado.