Pontevedra e o 12-N, un día no que é "moito máis que un acto de xustiza"

Son xa 88 os anos que pasaron, pero o recordo dos pontevedreses fusilados polo franquismo o 12 de novembro de 1936 segue vivo na memoria da cidade.

Así se demostrou unha vez máis co sentido acto celebrado na pasarela José Adrio Barreiro.

Este lugar da Boa Vila leva o nome dun deses veciños asasinados na Caeira aquel fatídico 1936 xunto a Germán Adrio, Telmo Bernárdez, Amancio Caamaño, Víctor Casas, Luís Poza, Paulo Novás, Benigno Rey, Ramiro Paz e Juan Rico.

Unha xornada, o 12-N, "para lembrar o seu exemplo digno e para renovar o noso compromiso coa súa memoria e a de todas as vítimas do golpe de Estado do 36, asasinadas por defender as institucións democráticas dos envites do fascismo", defendeu no seu discurso o alcalde de Pontevedra, Miguel Anxo Fernández Lores.

Porque case nove décadas despois"a memoria é moito máis que un acto de xustiza con quen padeceu a represión", sinalou o rexedor.

É de feito segundo Lores "unha ferramenta necesaria e poderosa coa que loitar contra as ideas reaccionarias".

Tamén interveu no acto Pepe Álvarez Castro, afirmando que "falan algúns de non reabrir feridas, no que non deixa de ser un recoñecemento de que non están definitivamente curadas".

"Se o estiveran nunca abrirían, por moito que anden nelas", declarou o historiador defendendo que homenaxes como o que cada 12 de novembro leva a cabo en Pontevedra serven "para que as vítimas non sufran unha segunda morte, a definitiva, que sería o esquecemento".