A praia fluvial da Calzada, en Ponte Caldelas, opta oficialmente á bandeira azul, distintivo de calidade ambiental europeo que outorga a Asociación de Educación Ambiental e do Consumidor (ADEAC).
O Concello presentou toda a documentación necesaria para formalizar a candidatura, que en caso de prosperar convertería á área recreativa do río Verdugo na primeira praia fluvial de Galicia con este distintivo e a segunda de toda España.
Dende o goberno local móstranse optimistas coa posibilidade de lograr a bandeira azul pola calidade dos servizos cos que conta A Calzada e por "os excelentes resultados das análises que periodicamente se establecen nas súas augas".
Esta opinión viuse reforzada cando en agosto un inspector da ADEAC visitou a praia fluvial quedando, segundo o Concello, "gratamente sorprendido da beleza do ámbito".
Este inspector realizou unha serie de recomendacións para mellorar os servizos. Por ese motivo o próximo verán duplicarase o servizo de socorristas para que sempre permanezan de garda un mínimo de dous e realizaranse melloras na sinalización e a accesibilidade da zona.
Segundo explicou o alcalde, Perfecto Rodríguez, lograr a bandeira azul "merece facer un esforzo polo que supón tamén de promoción turística do municipio".
Dende o ano 2001, todas as análises realizadas pola Xunta de Galicia na zona de baño tiveron unha cualificación de "excelente" con respecto á calidade das súas augas, requisito indispensable para lograr a bandeira azul.