O domingo 28 de abril Poio organiza a I Xuntanza de Maiores, que terá lugar nunha carpa que se instamlará na Reiboa.
Así o anunciou o alcalde, Ángel Moldes, acompañado polos concelleiros de Benestar e Festexos, Natividad Torres e Fran Dasilva.
"Dá resposta a unha petición feita polos propios maiores do noso concello, que asisten ás festas que se organizan noutros municipios limítrofes pero tiñan a ilusión de gozar da súa propia xuntanza en Poio", explicou Moldes.
A xornada comezará ás 13.00 horas e incluirá un xantar popular (callos, carne ao caldeiro, bebidas e sobremesas), baile con música en directo e sorteos entre os participantes.
"Queremos que esta xuntanza sirva como punto de encontro para os maiores de todo o municipio, unha excusa para pasar unha xornada de lecer e de convivencia todos xuntos", explicou o alcalde.
As persoas interesadas en asistir poden inscribirse desde este luns 1 de abril no Palacete de Besada, en horario de 9.00 a 14.00 horas, cun custo de 20 euros. O primeiro prazo de inscrición ata o 15 de abril será exclusivamente para a veciñanza empadroada en Poio, persoas xubiladas ou pensionistas maiores de 60 anos. A partir desa data e ata o día 22 de abril habilitarase tamén un prazo para persoas residentes noutros concellos.