Desde mediados de xuño ata o 15 de setembro. Case tres meses será o período no que estará activo o servizo de socorristas nas praias de Cabeceira e Xiorto. De cara a esta medida, o Concello de Poio iniciou os trámites para contar con seis profesionais.
Será a través da liña de axudas que cada ano convoca a Consellería de Economía, Emprego e Industria para a contratación temporal de socorristas.
En concreto, o goberno municipal pedirá unha axuda de 38.105 euros para poder asumir o pago das nóminas dos traballadores que se encarguen deste servizo de vixilancia. Ademais, o Concello destinará preto de 1.000 euros para asumir os gastos correntes en material farmacéutico e no vestiario dos profesionais.
Os seis socorristas serán persoas en situación de desemprego. A duración dos contratos será de tres meses. A vixilancia nas dúas praias efectuarase entre as 12.00 e as 20.00 horas.
O concelleiro de Medio Ambiente e Persoal, Xosé Luís Martínez, entende que estas contratacións son "necesarias" para poder dar resposta ás necesidades da veciñanza nesta materia, debido ao aumento da poboación que experimenta Poio durante a época estival.
Por outra banda, Martínez recorda que o goberno local prevé incorporar a outros 24 traballadores, con carácter temporal, ao longo deste ano, ao abeiro da liña 3 do Plan Concellos da Deputación de Pontevedra, a través dun investimento que supera os 230.000 euros.
Parte destas novas incorporacións traballarán, precisamente, no mantemento das praias, unha tarefa que, tal e como puntualiza o concelleiro nacionalista realízase "de xeito regular" durante todo o ano.
Sobre esta cuestión, o edil asegura que, de momento, o inverno está sendo benévolo cos areais de Poio e, a diferenza doutros anos, nesta ocasión non se están producindo incidencias nin danos importantes nas praias. A maioría das tarefas céntranse, sobre todo, na retirada de restos que as correntes mariñas trasladan ata a area.
O Concello garante que os areais estarán en "perfectas condicións" de cara o inicio da Semana Santa.