Podemos propón a creación dunha casa de baños pública en Pontevedra

Pontevedra
13 de abril 2023

Luisa Lores, candidata á alcaldía da cidade pola formación morada, considera "indispensable" a posta en marcha deste proxecto e denuncia as eivas da cidade en materia de accesibilidade e a necesidade de poñer ás persoas no centro das políticas municipais

Presentación de María Luisa Lores como cabeza de lista de Podemos ás eleccións municipais
Presentación de María Luisa Lores como cabeza de lista de Podemos ás eleccións municipais / PontevedraViva

Luisa Lores, candidata de Podemos á alcaldía de Pontevedra, considera "indispensable" a posta en marcha dunha casa de baños pública na cidade. Asegura que "este servizo será 100% público, de titularidade municipal e sen ningún tipo de concesión a empresas privadas, así como totalmente gratuíto para a cidadanía”.

O proxecto, segundo a formación morada, disporía de baños e duchas autolimpables e de cambiadores adaptados para persoas con diversidade funcional. Así mesmo, tamén deberá estar equipado de máquinas de lavado e de secado.

A médica de profesión apunta a necesidade de impulsar "un modelo de cidade accesible" xa que asegura que o Concello está máis preocupado polas cuestións estéticas, e a cidade ten graves carencias en materia de accesibilidade.

A candidata de Podemos Pontevedra pon o foco tamén na necesidade de que estes baños estean adaptados para persoas ostomizadas, cun inodoro especial e un mesado e luz frontal permanente sen sensor de movemento.

Este servizo, segundo explica o partido, disporía dunha persoa ao seu cargo durante o seu horario de apertura para o seu mantemento e coidado e tamén para asistir aos usuarios con maiores dificultades. A súa localización sería nun lugar céntrico e aberto e de plena accesibilidade, engade a formación morada.

Lores insiste en que "non hai escusa para non seguir o modelo de moitas cidades europeas que xa recuperaron este espazo con éxito". Por iso, a formación morada reivindica esta proposta como un servizo esencial á poboación e que pon as persoas e as súas necesidades no centro das políticas públicas que, segundo indican, deben rexer no Concello.