Chega unha nova entrega da serie "A cociña gourmet en conserva", da man de Conservas Pescamar. Nesta ocasión, imos preparar unha receita que nos trae os aromas da cociña italiana e coa que imos aproveitar todos os beneficios das luras e os mexillóns de Conservas Pescamar.
Dende un punto de vista nutricional, a lura destaca polo seu contido en proteínas de gran calidade e en ácidos graxos poliinsaturados omega 3. Ademais, é baixa en graxas e calorías.
O mexillón é un molusco altamente nutritivo, grazas á súa achega en ferro, fósforo, vitamina B12 e omega 3. Caracterízase, ademais, polo seu baixo contido en graxas e alta porcentaxe de proteínas.
Para preparar unha deliciosa Pizza picante de mariscos con mexillóns e luras ao allo Pescamar, necesitamos os seguintes ingredientes:
- 1 base de masa de pizza fresca
- 1 lata de luras ao allo Pescamar
- 1 lata de mexillóns ao natural das Rías Galegas Pescamar
- 400 g. de tomates
- 150 g. de queixo mozarella especial para pizza
- 100 g. de gambas peladas
- 1 chile
- 1 cebola mediana
- ourego
- follas de albáfega
- pementa negra
- aceite de oliva virxe extra
Preparación:
Prequentamos o forno a unha temperatura de 180ºC. Mentres tanto, fritimos a cebola picada miúda e os tomates pelados ata que se evapore o líquido. Unha vez fritos, déixanse arrefriar.
Poñemos noutra tixola un chorro de aceite de oliva e o chile. Cando estea quente, incorporamos as gambas previamente cortadas en anacos. A lume lento, remexemos constantemente ata que as gambas estean feitas.
Co lume baixo, retiramos o chile e engadimos a lata de luras ao allo Pescamar, co seu líquido incluído, e a lata de mexillóns ao natural das Rías Galegas Pescamar, previamente escorrida. Revolvemos suave e retiramos do lume.
Colocamos a base de pizza sobre a placa de forno untada con aceite, deixando un pouco máis elevado o bordo exterior da masa. Picamos varias veces cun garfo, distribuímos o rustrido de cebola e tomate que tiñamos reservado, e poñemos por riba o queixo. A continuación, colocamos as gambas, as luras e os mexillóns.
Esparexemos por enriba unha cullerada de ourego e un chisco de pementa negra. Finalmente, asperxemos cun pouco do aceite polo que pasamos as gambas, as luras e mexillóns.
Introducimos a pizza en forno medio xa prequentado e deixámola uns 15-20 minutos.
Retiramos e servimos con follas de albáfega cortadas repartidas por enriba.
En quince días, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.
