A tenente de alcalde do Concello de Pontevedra, Eva Vilaverde, compareceu este venres en rolda de prensa facendo as funcións de "heraldo" dos Reis Magos para ratificar que este domingo terá lugar a Recepción na Casa Consistorial a Melchor, Gaspar e Baltasar e que pola tarde sairá a Cabalgata polas rúas da Boa Vila.
Entre un e outro evento repartiranse dúas toneladas de caramelos que serán aptos para celíacos e, no caso da recepción, ademais, serán sen azucre.
"Os Reis Magos tiñan que vir a Pontevedra e van vir a Pontevedra tal e como estaba previsto. Os nenos e nenas portáronse moi ben este ano polo que nos transmitiron e non podía ser doutro xeito", explicou a concelleira.
"Igual a Cabalgata vai algo máis rápido do habitual para evitar estar baixo a auga moito tempo, pero polo resto imos tentar adaptarnos ao que sexa, con paraugas ou sen el", engadiu.
A Casa Consistorial acollerá por vez primeira a recepción dos tres magos, que se realizará o domingo a partir das 11.00 horas. Adultos e crianzas poderán coñecelos de primeira man, sacar fotos, coller caramelos e facer peticións de última hora.
CABALGATA
A zona de concentración dos participantes no desfile será a Avenida de Lugo e a rúa Loureiro Crespo (entre Virxinia Pereira e a rúa Rodríguez Seoane).
A cabalgata percorrerá a partir do seis da tarde (18.00 horas) as rúas: Loureiro Crespo, Benito Corbal, Praza da Peregrina, Michelena, Praza de España, Alameda. A zona de recollida será na rúa Echegaray.
Nos primeiros 200 metros de percorrido a Cabalgata non terá música nin ruido para adaptarse aos menores con trastorno de espectro autista (TEA).
Na comitiva para a Cabalgata dos Reis Magos 2025 participará a Policía Local que irá encabezando a marcha xunto ao camión-escaleira de Bombeiros.
A continuación desfilará a Banda de Música de Pontevedra e seguidamente chega a primeira carroza de Alicia no País das Marabillas.
Logo pasará a Charanga Airiños de San Martiño e os "Coellos de Nadal" de Rivel Animación seguidos de "As árbores de Nadal " da compañía Pablo Méndez Performance.
Será a quenda entón da "Funky Funky Troula" antes de que chegue a Carroza de Bambi.
Máis animación con "A galiña dos ovos de ouro", de Art-Monium, seguida de Barafunda coa súa "Pomba da Paz" e dos "Trasnos vermellos", de Rivel.
Os Gaiteiros das Rías Baixas abrirán o paso á Carroza Inside Out e aos camelos da Festa Escénica, seguidos do grupo folclórico "Pola vila".
Segue máis animación co grupo Troula que trae a "Benito e Rufina" e o grupo Art-Monium cos seus "Carboeiros".
O primeiro Rei Mago en aparecer será Melchor coa súa gran carroza.
Detrás del desfilará Troula con "A luz do camiño", Barafunda con "Camelos", Art-Monium con "Unicornio e familia" e os "Soldados de chumbo", de Pablo Méndez.
E chega a carroza do Rei Gaspar.
Continúan o desfile Os de Algures, Art-Monium coa "Dragoada", Rivel Animación cos "Bonecos de neve" e a Hípica Celta.
Pechará a Cabalgata a carroza do Rei Baltasar.