Tras o éxito rexistrado en anos anteriores, a Deputación de Pontevedra repite as visitas teatralizadas de Samaín ao castelo de Soutomaior.
"Ante esta gran demanda que houbo o que fixemos foi ampliar o número de prazas diarias, pasando das 720 ás 1.020", anunciou este venres o presidente da Deputación, Luis López.
No castelo haberá dúas modalidades de visitas teatralizadas, para persoas adultas e para público familiar, ambas realizadas por Troula Animación.
Desenvolveranse entre o 4 de outubro e o 1 de novembro. As visitas destinadas a un público de todas as idades serán ás 12, 16 e 17.30 horas. Cando caia a noite será a quenda do público adulto, que poñerá a proba a súa valentía nunha visita guiada onde nada é o que parece. Estas actividades, recomendadas a partir dos 16 anos, terán lugar ás 20.30 e ás 21.45 horas.
Cada visita ten unha duración de 60 minutos e poderán participar 30 persoas.
"Os organizadores da compañía Troula Animación prometen facer o que todos queremos: Pasálo ben e ao mesmo tempo simulando que o pasamos mal. Eu xa estou convencido que o van conseguir", dixo o presidente provincial.
As entradas para estas actividades estarán á venda en www.castelodesoutomaior.com e custan 8 euros por persoa.
PONTEVEDRA LITERARIA. XUVENTUDE E ARTES
A Deputación traballa na organización dun encontro provincial literario e artístico que se celebrará no Edificio Castelao do Museo de Pontevedra os días 17 e 18 de outubro e no que xa está confirmada a participación de escritores de ámbito internacional como o colombiano Héctor Abad Faciolince e nacional como Arantza Portabales e Manel Loureiro.
O presidente provincial presentou este venres o cartel que foi deseñado por Denis Carballas gañador do concurso convocado para ese efecto.
"Este encontro reforza a marca da provincia como un territorio de letras e da cultura", destacou Luis López.