A multinacional chinesa Sungrow proxecta a construción dun parque de baterías no polígono de Nantes, en Sanxenxo.
Esta actuación levará a cabo a través da promotora Soner Sorolla, que é filial de Sungrow Renewable Energy Spain SL.
O parque situarase nunha parcela de 3.031 metros cadrados.
O investimento ascende a 6,5 millóns de euros e xa conta con autorización administrativa de construción para o proxecto e para a súa liña de evacuación.
Trátase dun parque de almacenamento de electricidade con acumulador de 5 megawatts (MW) de potencia e 20 MWh de reserva, conectadas mediante unha liña eléctrica de media tensión subterránea de 1.346 metros á subestación eléctrica de Sanxenxo, propiedade de Unión Fenosa.
Segundo detalla a declaración ambiental emitida pola Consellería de Medio Ambiente, as baterías gardaranse en "colectores de dimensións especiais".
Concretamente, serán catro colectores destinados a albergar baterías baseadas en tecnoloxía lithium iron phosphate (LFP) en modalidade stand-alone. Cada colector está composto por 6 racks (que á súa vez conteñen 8 módulos de baterías) e 6 inversores DC/AC.
A iniciativa denomínase Bess Sanxenxo e o Ministerio de Transición Ecolóxica concedeulle unha axuda de 1,5 millóns.
NAVE DE SERVIZOS
Tamén no polígono de Nantes, avanza a bo ritmo a construción da nova nave de servizos municipal, coa cuberta e paredes xa executadas, segundo informa o Concello.
A edificación ten unha superficie de 3.800 metros cadrados, costa 2,6 millóns de euros e ten un prazo de execución de 10 meses, polo que estará lista na primavera. A súa construción permitirá ao Concello de Sanxenxo o aforro de 40.000 euros ao ano polo actual aluguer do almacén.
A parcela municipal na que se levanta a nave ten unha superficie de 8.343 metros cadrados. O almacén incluirá no soto un aparcadoiro para 16 vehículos municipais e tres puntos con cargadores eléctricos. Tamén contará con paneis solares. O obxectivo é construír un edificio sostible e ecoeficiente. O exterior disporá dun aparcadoiro e un xardín.