O Concello de Vilagarcía adquirirá e reparará o pantalán situado no peirao de pasaxeiros, trasladándoo a unha nova ubicación próxima á nave de usos náuticos para facilitar a súa utilización polos clubs deportivos da zona.
A operación de compra, que se realizará a través da Fundación de Deportes, suporá un investimento de 6.000 euros para facerse coa propiedade que actualmente pertence ao Liceo Casino.
"A nosa intención é achegalo á zona de adestramento dos clubs deportivos, como o de piragüismo ou o de submarinismo, entre outros", explicou Carlos Coira, concelleiro de Deportes, quen destacou que a actual localización do pantalán "non ten sentido mantela onde hoxe está".
O estado actual da infraestrutura require unha importante intervención, xa que presenta varios listóns de madeira desgastados ou rotos que deberán ser substituídos.
Ademais, procederase á renovación completa dos flotadores para garantir a estabilidade da plataforma unha vez se instale na súa nova ubicación.
Esta actuación complementa o acordo asinado en 2022 entre o Concello e Portos de Galicia, mediante o cal se cedeu a antiga nave de "Alfogar" para a creación dun centro de usos náuticos.
Grazas a este convenio, con vixencia de dez anos, o Club de Piragüismo puido trasladarse a unhas instalacións máis amplas e en mellores condicións que as que tiñan anteriormente no peirao de pasaxeiros.
Dende o goberno municipal agradeceron a colaboración de Portos de Galicia que, segundo palabras do concelleiro Coira, "sempre actúa dilixentemente para acadar acordos", tanto na cesión do espazo como na busca da mellor localización para o pantalán..