A Panadaría Acuña anunciou a posta en marcha dunha campaña de recollida de produtos básicos para as persoas afectadas pola recente DANA en Valencia.
Os puntos de recollida habilitados son a nave da empresa no Polígono de Barro (parcela a20) e o local de Acuña na parroquia pontevedresa de Salcedo, na estrada nacional N-550.
A data límite para a recollida destes produtos de primeira necesidade termina este mércores día 6 de novembro.
A campaña céntrase en colleitar produtos solicitados pola Federación Española de Municipios e Provincias (FEMP), que coordina o envío de axuda desde distintos puntos de España.
Solicítase auga, leite, alimentos non perecedoiros e artigos de hixiene persoal como toalliñas húmidas, desodorizantes, pasta dentífrica, cepillos de dentes, entre outros.
A Panadaría Acuña quere participar na resposta solidaria da cidadanía canalizando esta axuda para poder facela chegar ás familias que tanto o necesitan en Valencia despois de perdelo todo.
Trátase de axudarlles a reconstruír a súa vida.
Agora os esforzos céntranse no rescate e atención das persoas afectadas, así como en tarefas de recuperación das vivendas das zonas damnificadas. As autoridades advirten que o restablecemento completo da cadea de subministración podería levar varias semanas, especialmente nas áreas onde os danos en infraestrutura son maiores.
