Protección Civil de Poio está de aniversario. Este domingo 14 de xullo cumpre trinta anos. E o Concello, en colaboración coa propia agrupación xa traballan nun acto aberto para render homenaxe aos voluntarios que nalgún momento da súa historia formaron parte da agrupación.
A homenaxe realizarase en outubro, coincidindo co momento no que a agrupación se constituíu oficialmente e se publicaron os seus estatutos.
O alcalde, Ángel Moldes, reuniuse coa directiva de Protección Civil de Poio para comezar a organizar este recoñecemento á labor de todas as persoas que, de xeito totalmente altruísta e comprometido, fixeron unha importante labor de servizo público e protección á cidadanía.
Así, acordaron que será un acto aberto, ao que se convidará a participar a todas as persoas que nalgún momento deses trinta anos formasen parte ou tiveran un vínculo coa agrupación.
Moldes puxo en valor o "traballo, disposición, compromiso e preparación" de todos os voluntarios, que ao longo destas tres décadas "fixeron unha labor fundamental e moi recoñecida para Poio e para a veciñanza".
Ademais, destacou a traxectoria de Manuel Vicente, presidente de Protección Civil de Poio e que leva xa 28 anos na agrupación; de Víctor M. Lores, que forma parte desde os inicios hai 30 anos; José Luis Castiñeira, membro desde hai 28 anos; e de Luis Miguel García Rodríguez, que vai cumprir 26 anos en Protección Civil de Poio e recibiu hai uns días a medalla ao mérito da Xunta.
Con todo, o alcalde fixo extensible este recoñecemento e agradecemento aos máis de trinta voluntarios que hoxe forman Protección Civil de Poio.