O estado "absolutamente ruinoso" do Pazo de Lourizán é para os socialistas pontevedreses un "exemplo paradigmático" do que consideran un "absoluto desprezo e racanería" de Alfonso Rueda e de todo o seu goberno con Pontevedra.
A candidata Paloma Castro asegurou que meses despois de que o líder do PP anunciara un investimento de 18 millóns de euros para a reforma integral deste pazo e a convocatoria dun concurso de ideas "non sabemos nada deses cartos que prometeu".
No marco dunha visita a este inmoble, na que estivo acompañada polos tamén candidatos Pedro Hermida e Lina Garrido, Castro recordou que existe un fallo firme que declarou ao goberno da Xunta como administración competente para a conservación do Pazo de Lourizán.
Segundo relatou a socialista, para cumprir con esta resolución xudicial, a Xunta habilitou nos orzamentos do ano pasado unha achega de 200.000 euros, unha cifra que considera "claramente ridícula" tendo en conta as características das reformas necesarias.
"Nós xa temos ben clariño que o seu anuncio foi unha manobra disuasoria e pura propaganda electoral, pero pedímoslle a Rueda que deixe de tomar o pelo aos pontevedreses con partidas irrisorias e que amose ese amor total que di ter pola nosa cidade", sinalou Paloma Castro.
Castro considera que "a ninguén cun pouco de pudor, decencia e dignidade persoal" se lle tería ocorrido facer unha foto xusto no Pazo de Lourizán, "salvo que o que queira inmortalizar cos seus candidatos é precisamente a fraude e a nefasta xestión do PP".
Os socialistas esixen que o goberno autonómico cumpra coas súas competencias en materia de patrimonio histórico e artístico e exerza o seu deber de conservación deste inmoble, integrado no catálogo do patrimonio cultural de Galicia.
O seu interior, segundo Castro, "ameaza con caer a pedazos, ata o punto de que non é posible entrar en ningunha das súas dependencias, con paredes descunchadas, teitos con frisos de escaiola destrozados e pisos de madeira agretados que piden a gritos a súa urxente restauración".