Un total de 117 casos activos de covid-19, dos que oito se atopan hospitalizados en Montecelo e 109 son pacientes asintomáticos ou con síntomas leves que pasan a enfermidade en corentena no seu domicilio. Esta é a radiografía diaria da evolución da pandemia na área sanitaria de Pontevedra e O Salnés este venres 18 de xuño.
Segundo o parte diario facilitada polo Servizo Galego de Saúde, os casos activos reducíronse na última xornada, confirmando unha tendencia á baixa da incidencia que se manifestou nos últimos días, pero deixara un pequeno repunte o xoves.
En concreto, este venres, confirmáronse 11 novos positivos, pero tamén recibiron o alta 21 pacientes, de modo que o total de casos activos baixa en 10, ata os 117.
Nos hospitais, a situación empeora lixeiramente. En concreto, hai oito pacientes hospitalizados, todos eles no Hospital Montecelo, un máis que o día anterior. Un deles está na unidade de Coidados Críticos, sen variacións con respecto ao día anterior. En planta de hospitalización hai sete, un máis desde o último parte diario.
Nas últimas 24 horas destaca a realización dunha cantidade reducida de probas PCR, 254, aínda que son máis que as 196 do día anterior. Neste sentido, hai que ter en conta que os novos positivos tamén se confirman por outros medios, como os test de antíxenos.
Desde o inicio do plan de continxencia da covid-19 realizáronse 244.564 probas PCR na área sanitaria de Pontevedra-O Salnés e curáronse 14.102 pacientes (21 na última xornada).
Non hai cambios no balance de vítimas mortais da pandemia na área sanitaria, 181 ata o de agora.
EVOLUCIÓN EN GALICIA
A última actualización de datos da Dirección Xeral de Saúde Pública da Consellería de Sanidade recolle que o número de casos activos de coronavirus en Galicia é de 1.344, 11 menos que o día anterior. Na última xornada confirmáronse 97 altas, 87 novos contaxios e un falecido.
Por áreas sanitarias, as infeccións activas descenden en Vigo (244, 20 menos); Pontevedra e O Salnés (117, 10 menos); Lugo (175, 2 menos) e Santiago e Barbanza (126, 1 menos). Non hai cambios en Ferrol, que se mantén con 96 casos e medran os casos activos en A Coruña (431, 21 máis) e Ourense (155, 1 máis)
Do total de pacientes positivos, 61 están nos hospitais galegos, 16 en UCI, 45 en unidades de hospitalización. Os 1.283 restantes están no domicilio.
Polo de agora, en Galicia hai un total de 124.555 persoas curadas e 2.431 vítimas mortais.
O número de PCR realizadas é de 2.321.732 e a cantidade de doses de vacina contra a covid-19 administradas é de 2.355.077.