O goberno local de Sanxenxo convocou a Comisión de Facenda para o próximo día 24 e levará ao Pleno ordinario, o luns 31 de marzo, a aprobación dun orzamento de 41.056.869 euros.
Este orzamento distribúense da seguinte maneira: para a Entidade Local son 33.778.208 euros; o Organismo Autónomo Terra, 9.320.610 euros; Turismo de Sanxenxo, 1.862.800 euros; Nauta, 2.631.850 euros; Insula, 2.324.065 euros. Co que a suma total é de 49.917.533 euros, cantidade á que hai que restar 8.860.664 euros de eliminacións internas.
O goberno local destaca que neste ano 2025 "Sanxenxo vaise a beneficiar de 19,7 millóns de euros de investimentos", das que o 80% procede doutras administracións e de fondos europeos.
Doutra banda, o gasto social consolidado ascende a 9,3 millóns de euros fronte aos 7,7 millóns do ano pasado.
Este gasto social, a diferenza dos investimentos que poden diminuír ou crecer segundo o ano e as achegas propias e doutras administracións, depende de custos que nunca baixan, como a prestación de servizos, o mantemento de equipamentos e o persoal.
Desde o executivo local recalcan que "Sanxenxo é un referente pola súa política social cun gasto por habitante dos máis altos de Galicia".
En 2025 volverá aumentar, porque o orzamento prevé ampliar o número de familias ás que vai atender o Servizo de Atención no Fogar cun incremento do gasto de 802.000 euros máis que en 2024.
Doutra banda, en 2024 o Concello tivo que pagar, dunha soa vez, 9,8 millóns de euros da expropiación da zona verde e o viario das Cunchas. Posibilidade que xa contemplaba o orzamento no caso de que a xustiza denegase o pago fraccionado en varias anualidades como así foi por mor da sentenza Rocafort.
O Concello, que até ese momento tiña débeda 0, tivo que solicitar un crédito de 7 millóns de euros para facer o pago. En consecuencia, a liquidación do orzamento de 2024 aflorou, por unha banda, un remanente de tesouraría de 1,6 millóns de euros e, por outro, un déficit puntual equivalente ao crédito solicitado.
O goberno local aclara que esta situación "non vai repercutir na calidade dos servizos e os investimentos ao tratarse dunha causa excepcional e conxuntural que non require medidas de axuste".