Multitudinaria xornada este domingo 9 de marzo no día grande da XXVI Festa do Lacón con Grelos de Cuntis.
Nin a choiva conseguiu deslucir un evento plenamente consolidado e que supón toda unha oda a un dos pratos estrela da gastronomía galega.
De feito o clima permitiu gozar ao aire libre de momentos como o desfile do Entroido Tradicional de Cobres e os pasarrúas da Agrupación Municipal de Música e Baile Tradicional de Cuntis.
A mostra 'A camelia no lacón con grelos' ou exposicións de Encaixe das Palilleiras ou de Cerámica de Castrolandín achegaban o seu gran de area no bo ambiente.
A artista Fátima Pego foi a encargada de ler o pregón da Festa do Lacón 2025, dando paso a un mediodía dos máis animado.
A Charanga Los Támega puña a nota musical, chegando ao momento que todos esperaban, o xantar popular, que contou cunha grande asistencia abarrotando a carpa instalada para a ocasión.
Ao longo da xornada despacháronse preto de 2.000 racións de lacón, patacas, chourizo e grelos (ademais de pan, bebida, sobremesa e café), ás que hai que sumar as ofrecidas en establecementos hostaleiros.
Xa pola tarde o Trío Detrés ofrecía un espectáculo infantil con máis actuacións musicais, de Laura Añón e Ángel Sevilla.
Un non parar de bo ambiente e celebración até o radicional Velorio e Enterro do Chapante, figura de entroido que ridiculiza aos corruptos chea de humor e coa que se pon fin a tres xornadas de Festa do Lacón con Grelos.
