O Tribunal Superior de Xustiza de Galicia (TSXG) acaba de confirmar a sentenza da Audiencia de Pontevedra que absolveu a Manuel Gallego, un veciño da parroquia de Cerponzóns acusado dun delito contra a liberdade sexual e doutro de ameazas por presuntamente realizar tocamentos e ameazar á súa veciña.
A suposta vítima recorreu a sentenza da Audiencia, pero a Sala do Civil e Penal do TSXG desestima o recurso e confirma o fallo xudicial inicial.
Como xa fixo a sección cuarta da Audiencia Provincial, o TSXG recolle que o sospeitoso mantiña malas relacións coa súa veciña que "deron lugar a múltiples problemas, moitos deles xudicializados" e que o 28 de xuño de 2022, a muller foi a comprobar os danos que se lle causaron ao demoler a vivenda do acusado, pero non ocorreu nada máis.
Así, sinala que a muller acudiu en compañía da súa filla e dun operario para comprobar a demolición, levada a cabo como consecuencia dun procedemento administrativo de reposición de legalidade urbanística, "sen que consten acreditados outros extremos".
O acusado só admitiu ver á denunciante a tarde dos feitos xunto á súa filla mentres que a muller aseguraba que o acusado lle tocou nas nádegas e a zona vaxinal, agarroulle un peito e díxolle que lle ía a cravar un coitelo "e que ía ir coas tripas arrastro".
A filla desta muller confirmou o relato da súa nai sobre o ocorrido, que ela afirmaba presenciar, pero nin a Audiencia nin o TSXG consideran probado que ocorrese.
A vivenda de Manuel Gallego foi demolida por orde da Axencia de Protección da Legalidade Urbanística (APLU). Mentres se realizaban as tarefas de derriba, a súa veciña denunciouno por ameazas e abuso sexual e os veciños da parroquia reaccionaron manifestándose durante semanas no seu apoio.