O Concello de Marín valora como un "éxito rotundo" a acollida que está a ter o tren de Nadal que por cuarto ano inaugura a campaña dinamización que puxo en marcha o Concello.
O tren do Nadal comezou a actividade o venres pola tarde e ata o domingo foron 1.772 persoas que se subiron e viaxaron polo tradicional percorrido, saíndo desde a Alameda de Marín, desprazándose polas rúas máis céntricas da vila, achegándose ao mercado e regresando á alameda Rosalía de Castro.
Ademais coincidiu coa inauguración do carrusel que puxo en marcha a Asociación de Comerciantes Estrela de Marín co apoio do Concello.
Nesta ocasión ampliouse a oferta de días para os colexios de Marín, que percorren o núcleo urbano, entran no recinto da Escola Naval Militar, achéganse á zona das praias de Portocelo, Mogor e Aguete, regresando pola estrada xeral que une Marín- Cangas.
FINALIZACIÓN DE OBRAS E OUTRAS REPARACIÓNS
Antes do parón do Nadal está a apurarse o pintado da rúa Concepción Arenal, no tramo que estivo en obras, o asfaltado realizouse a semana pasada e están xa cos remates finais co obxectivo que este xa finalizada antes das festas.
Tamén se está arranxando o firme na rúa de acceso ao pavillón do instituto Illa de Tambo, na rúa Camiño Vello do cemiterio, así como o firme que se levantou con motivo da rotura de tubaxe que tivo lugar na estrada do Grupo Escolar en Seixo. Este luns tamén se iniciaron os traballos para dotar dos lombos que foron solicitados polos veciños da barriada de Mogor, cuxa moción exposta no pleno foi apoiada por parte de todos os grupos.