En Cuntis xa cheira a lacón. Como aperitivo do Entroido e dúas semanas antes de que se celebre unha nova edición do seu tradicional Festa do Lacón con Grelos -prevista para o domingo 22 de febreiro-, a vila termal acolleu durante toda a fin de semana unha nova cita co certame gastronómico Tapalacón.
Foi unha suculenta ruta gastronómica polos catorce locais de hostalaría que participaron este ano.
Centos de persoas animáronse a probar as propostas que prepararon os hostaleiros de Cuntis. Con cada consumición, os clientes podían probar dúas tapas gratis. Todas elas foron novas receitas, xa que o certame obrigaba a presentar tapas diferentes as de anos anteriores. E, como mandan os canons, a innovación foi a protagonista absoluta.
Os locais participantes foron Don Manuel, A Tenda da Ponte, O Traspaso, A Fontiña, A Casa da Burga, A Bolera, O Parladoiro, Restaurante Praza, 7 Camiños, Batifoula, O Paseo, A Casa das Pejas, Café-Bar Chistoso e Mesón O Valenciano.
Os clientes foron o xurado de excepción desta cita gastronómica. Mediante unhas cartillas que podían recoller en cada local, puntuando cada unha destas tapas. O nome dos gañadores coñecerase nuns días e haberá tamén premios para o público.
A ruta de Tapalacón, que se desenvolveu as tardes-noites de venres e sábado e a mañá do domingo, estivo amenizada coa actuación da Agrupación de Gaitas de Cuntis.