Centos de persoas seguiron durante a tarde deste venres 19 de agosto o percorrido da tradicional Batalla de Flores das Festas da Peregrina.
A pesar de que o día amencera con choivas, o ceo quedou despexado durante a tarde e o desfile realizouse con total normalidade. Nesta ocasión, as nove carrozas participantes retomaban un traxecto que se probou hai moitos anos. Partiron ás 19.00 horas da rúa Loureiro Crespo para avanzar por Benito Corbal, continuar pola rúa Cobián Roffignac e finalizar na contorna do río Lérez.
A concelleira Carme da Silva sinalou que este novo percorrido débese ás obras que se acometen nas vías de acceso a Eduardo Pondal, por onde transcorreu a batalla floral durante os últimos anos. A responsable das festas indicou que para próximas edicións non se descarta que se repita o traxecto deste ano atendendo ao número de persoas que o seguiron.
Unha vez máis o colorido e a diversión marcaron este evento tradicional das festas onde non faltaron os dragóns de globos e un gran Pikachu.