Despois das críticas realizadas o venres polo PSOE ao sinalar como "absolutamente inasumible e inaceptable" que Costas non acabe o paseo a Marín, durante esta fin de semana os socialistas de Pontevedra mantiveron "diversos contactos" dentro da súa formación política que recolocan a súa postura ante esta situación.
Agora, o portavoz do PSOE en Pontevedra, Iván Puentes, xustificou que o Ministerio de Transición Ecolóxica descarte facer o segundo tramo do paseo peonil a Marín tal e como estaba contemplado debido ás condicións que agora se esixen tras a aprobación da Lei de Cambio Climático combinada coa Lei de Costas.
A nova lexislación, sinala Puentes, obriga a ter en conta novos aspectos no deseño destas infraestruturas co que o segundo tramo do paseo a Marín, a día de hoxe, tal e como estaba contemplado "resultaría incompatible" coas leis e, por tanto "non se podería executar nos termos nos que estaba previsto, o que obriga a reformular" este tramo pendente por entender que vulnera a normativa de Costas ao invadir a lámina de auga e ter prevista a colocación de pilotes sobre a ría.
"Pero reformular non significa cancelar nin significa renunciar a esta infraestrutura", matizou o portavoz do PSOE. Desde outubro de 2021, data na que o Ministerio descartou este proxecto está a cidadanía pendente dunha solución definitiva para os 783 metros que faltan de paseo.
Iván Puentes manifestou que ao PSOE de Pontevedra cónstalle que "nesta postura de reformular, non a de renunciar, a de buscar alternativas, é na que está o Ministerio" desde hai máis de dous anos e por iso "os socialistas de Pontevedra e de Marín" esixen "de maneira urxente" que o Goberno de España, e particularmente á Dirección Xeral da Costa e do Mar presente esa alternativa.
Iván Puentes asegurou que este é tamén o posicionamento que defende a dirección do Partido Socialista en Galicia e "particularmente" o secretario xeral José Ramón Gómez Besteiro.
A pesar de estar convencido de que o Ministerio non descarta acabar o itinerario peonil ata Vos Praceres, o PSOE considera que "para que non quede ningunha dúbida" debe presentar unha moción para que o Concello de Pontevedra inste o Goberno de España a que finalice este proxecto mediante o estudo de alternativas "que fagan compatible esta necesidade e demanda dos veciños e veciñas de Pontevedra e Marín coa preservación da Costa, a loita contra os efectos do cambio climático e o respecto á lexislación vixente nesta materia".
Igualmente, quere que o Concello inste o Ministerio a que "proxecte, licite e execute, á maior urxencia posible" este tramo pendente e que se poida conectar "en condicións de seguridade" coa actual pasarela de madeira.