O PP de Barro reaccionou este venres ao anuncio do BNG e o PSOE de que asinaron un pacto de goberno para a localidade. O grupo municipal 'popular' lamenta que o novo goberno bipartito "vaia esquilmar as arcas municipais cun 50% máis de gastos en soldos". ao manter a adicación exclusiva do alcalde, Xosé Manuel Fernández Abrales, e crear un novo soldo para o tenente de alcalde socialista, José Sanmartín.
Os 'populares' consideran que se trata dun "auténtico escándalo, que demostra que o alcalde non atendeu aos intereses dos veciños de Barro" e "só quixo comprar vontades para asegurarse o seu sillón", sobre todo tras as "manobras iniciais do seu futuro tenente de alcalde para ocupar o seu posto buscando os apoios dos demais grupos da oposición".
O PP concretou que o soldo do alcalde Abraldes, máis o gasto da Seguridade Social, manterase en 45.000 euros anuais como na anterior lexislatura (34.000 euros anuais de salario e 11.000 de Seguridade Social), "pero os petos dos veciños terán que soportar o imposto revolucionario que suporá o gasto anual de 22.500 euros das arcas municipais para un liberado socialista" (17.000 euros anuais máis uns 5.500 de Seguridade Social).
O PP lembra que xa anunciou o seu apoio ás adicacións se non superaban os 45.000 euros anuais do mandato anterior e lamenta que as arcas de Barro "vaian dilapidar 90.000 euros nesta lexislatura nunha segunda adicación".
Critica, ademais, que considera que Barro vai "ter unha peor atención", xa que o pasado mandato o alcalde só se adicaba a xestionar, "con máis erros que acertos", pero esta terá menos tempo para os veciños, xa que, "como pasa en todos os bipartitos, pasará parte do día mirando de esguello e vixiando ao seu socio de intereses e rival político".