Javier Rey Campos, científico titular na Misión Biolóxica, será o novo delegado institucional do Consello Superior de Investigacións Científicas (CSIC) en Galicia. Substituirá a Antonio De Ron Pedreira, profesor de investigación na Misión Biolóxica, que desempeñaba este cargo desde marzo de 2019.
O novo delegado institucional do CSIC en Galicia exercerá, no ámbito territorial da comunidade autónoma, funcións de coordinación e representación ante outras institucións públicas e privadas e ante outros axentes de I+D+i con presenza no territorio.
Ademais, encárgase da dirección e xestión e de apoio á actividade de investigación, transferencia do coñecemento e a innovación, formación, difusión e promoción da cultura científica.
Javier Rey (Pontevedra, 1958) é licenciado en Ciencias Biolóxicas pola Universidade de Santiago de Compostela e doutor en Bioloxía pola Universidade Autónoma de Madrid. Desde 1993 é científico titular do CSIC.
As súas investigacións versaron, fundamentalmente, sobre a bioloxía molecular de virus animais como o virus da peste porcina africana, a xenética humana de xenes do sistema do complemento ou a regulación da expresión génica en animais.
Desde 2004 o seu labor centrouse na xestión, a análise e as estratexias de I+D+i e foi destinado á Misión Biolóxica de Galicia, con sede en Pontevedra, en 2014.