Unha guía en papel para que nenos, familias e os centros educativos poidan traballar os conceptos da seguridade viaria.
É o obxectivo do conto do Poli Paco que decidiu editar o Concello de Sanxenxo.
'Aprende seguridade viaria co Poli Paco' é o título da obra editada por Sanxenxo en colaboración co policía local Abelardo Martínez e a ilustradora Yolanda Martínez.
"Imprimimos 2.000 unidades para o alumnado de primeiro e ata cuarto de Primaria. A idea é dispoñer dunha unidade didáctica coa que os centros poidan traballar e reforzar o traballo de seguridade viaria que vén facendo dende hai anos o Poli Paco", explicou a edil de Educación, Nati Parada.
"Hai cancións en códigos QR, figuras para colorear e espazos do municipio como o parque da Panadeira, a senda do río Pintillón en Dorrón, a bandeira de Sanxenxo… Para que os nenos poidan familiarizarse coa contorna", explicou pola súa banda Abelardo Martínez.
Ademais as normas de seguridade viaria tamén aparecen en pictogramas para facilitar a aprendizaxe de nenos e nenas con TEA.
Trátase segundo a ilustradora do conto dun traballo "realizado en conxunto con moito agarimo, moito detalle, moito mimo", asegurando que "estamos a desexar que esta idea que xurdiu xa na pandemia poida ser testada polos nenos e nenas nos coles".