A concellería de Desenvolvemento Sostible e Medio Natural puxo en marcha un proxecto de renovación integral do parque infantil (de 3 a 12 anos) das Palmeiras mediante o cal se pretende reparar a totalidade dos elementos de xogo existentes, substituíndo aqueles que se atopen en peor estado. O recinto permanecerá pechado ao longo das tres semanas de duración das obras, para as que se destinou un orzamento de 44.000 euros.
Durante a mañá deste mércores 30, Iván Puentes, edil de Desenvolvemento Sostible, e Manuel Fontán, xefe do Servizo de Parques e Xardíns, supervisaron o comezo da emenda executada pola empresa caldense Garocaprim.
A reforma iniciouse coa retirada do pavimento deteriorado, cuxa restauración completa está prevista para cumprir coa normativa da Asociación Española de Normalización. A fin de mellorar as súas condicións, crearase unha capa de caucho SBR, un elastómero sintético empregado na fabricación de pneumáticos.
Así mesmo, disponse o pintado e mellora estética das diversas estruturas a través da limpeza de graffitis e o tratamento das madeiras, de acordo coa información aportada pola concellería.
Ademais, co obxectivo de facilitar o paso de todos os escolares á zona de xogo, que se sitúa sobre unha pequena elevación, pretende crearse unha rampla de acceso.
Puentes sinalou que "unha vez rematados os traballos, o parque someterase ao pertinente proceso de certificación da Entidade Nacional de Acreditación (ENAC)" grazas á optimización de calidade e seguridade das instalacións.
