Como un "día de satisfacción". Así describiu o delegado do Goberno en Galicia, José Miñones, o feito de que o Ministerio de Transportes desbloquease a ansiada reforma da ligazón Pontevedra norte da AP-9, o coñecido como Nó de Bombeiros.
O custo do novo proxecto, que tivo que ser reformado debido ao incremento dos custos dos materiais, ascenderá ata os 10,96 millóns de euros, 3,9 millóns máis que o anterior. O prazo de execución estará fixado en 14 meses.
A intención do Goberno é licitalo antes de final de ano e que as obras poidan comezar a mediados de 2023, segundo sinalou Miñones, que este martes revelou os detalles desta actuación ao alcalde de Pontevedra, Miguel Anxo Fernández Lores.
O que non cambia é a solución técnica que permitirá desconxestionar de tráfico o nó actual, mellorando a seguridade viaria e a mobilidade en todo este ámbito, ao repartir as entradas e saídas da AP-9 entre a Ponte das Correntes e a rotonda de Bombeiros.
Desta maneira, os coches que saian da autoestrada procedentes de Vigo sairán directamente á rotonda da ponte, xa na avenida Domingo Fontán, punto desde o que accederán á AP-9 aqueles condutores que queiran dirixirse cara ao Salnés, Caldas, Santiago e A Coruña.
Pola rotonda de Bombeiros, tras a demolición de varios dos seus viais de conexión, pasarán só os coches que cheguen a Pontevedra desde Santiago e os que entren na autoestrada para dirixirse cara a Vigo e o sur da provincia.
Ademais, haberá unha conexión directa desde a saída da AP-9 cara á PO-531 en dirección a Vilagarcía, de forma que todos estes vehículos xa non chegarán tampouco ata o nó.
O tramo final de Domingo Fontán, pola súa banda, duplicará a súa capacidade pasando a catro carrís entre a Ponte das Correntes e a rotonda de Bombeiros para absorber todo este novo tráfico.
O proxecto contempla, entre outras actuacións, unha senda peonil que permita unha circulación segura desde A Barca e a comandancia da Garda Civil cara á Xunqueira de Alba, segundo explicou o xefe da Demarcación de Estradas de Pontevedra, Pablo Domínguez.
En paralelo á preparación da próxima licitación das obras, iniciáronse contactos co Concello de Pontevedra, titular dos terreos interiores que ocupa o parque de bombeiros municipal, para subscribir un acordo para a ocupación dos terreos necesarios para as obras.
O Ministerio de Transportes deberá ademais asinan un convenio con Audasa, adxudicataria da AP-9, para poder abordar esta actuación, que será financiada con fondos propios do Goberno a través dos orzamentos xerais do Estado que, para 2023, reservan xa 1,5 millóns.
"Dámos resposta a unha demanda histórica dá cidade", sinalou José Miñones, destacando que o novo nó supoñerá unha "mellora moi importante" da mobilidade nesta zona. "Estaremos expectantes e vixiantes para se cumpran os prazos", engadiu.
O alcalde de Pontevedra, pola súa banda, subliñou que esta actuación supoñerá unha "mellora substancial" dunha das principais entradas á cidade, aínda que volveu a lembrar o atraso que acumula esta nova infraestrutura, cuxo primeiro proxecto data do ano 2016.