As lapas regresaron este xoves á parroquia pontevedresa de Ponte Sampaio. Pola mañá déronse pequenos focos de incendio no lugar de O Rañadoiro, un lugar gravemente afectado na xornada do mércores, e xa pola tarde quen volveu a ver o lume a escasos metros das súas casas foron os veciños de Vilar. Neste punto da parroquia empezou o pesadelo na tarde do martes e non acabou.
Fontes da Policía Local indicaron que durante varias horas da tarde deste xoves efectivos dos Bombeiros, Protección Civil e a Policía Local de Pontevedra atopábanse despregados nos lugares de Vilar e O Rañadoiro realizando tarefas de extinción de varios focos que chegaban ás proximidades de varias vivendas e axudando os veciños ao traslado de animais que estaban en cuadras e recintos ameazados polo lume a espazos seguros.
A diferenza do ocorrido na tarde e a noite do mércores, á primeira hora da tarde deste xoves non fora desaloxada ningunha casa e o lume parecía, segundo a Policía Local, controlado polos medios de extinción. Ás 19.30 horas, os medios de extinción regresaron a Pontevedra ao entender que non había perigo xa para persoas e casas, pero quedaban alerta os veciños.
Fontes veciñais indicaron nesta ocasión as lapas chegaron a Vilar por outro punto diferente aos dous días anteriores. En todas as ocasións, achegábase a este lugar desde os montes do Rañadoiro, pero este xoves arrasaban as vivendas situadas á entrada deste núcleo de poboación mentres nas xornadas previas as afectadas eran as caas do final.
Nas tarefas de extinción víronse implicados tanto os medios municipais como os propios veciños e efectivos da Consellería do Medio Rural, que este xoves tan só desprazou medios terrestres e non helicópteros ou hidroavións dado que as dimensións do lume eran reducidas.